أخر الاخبار

رواية خادمة الصقر الجزء الثاني الفصل التاسع والثلاثون 39 بقلم يوستينا سامي

رواية خادمة الصقر الجزء الثاني الفصل التاسع والثلاثون 39

 رواية خادمة الصقر الجزء الثاني الفصل التاسع والثلاثون 39


في بيت سيلين 🌹

دخلت وهي معاها بيتزا ومتسربعه جدا واول ما دخلت الشقه رمت المفاتيح والشنطه وجريت على جدتها

سيلين/ حبيبتي .. معلش انا عارفه اني اتاخرت عليكي بس والله العظيم غصب عني كان عندي جامعه و بعدها عملت مشوار للبنك و جبت البيتزا اللي انتي بتحبيها اهي

جدتها / يا حبيبتي اهدي بس خدي نفسك انا اصلا لسه واكله ... ايه ده مال وشك يا سيلين انت معيطه يا حبيبتي حصل حاجه ولا ايه 

سيلين في اللحظه دي انفجرت في العياط وحضنت جدتها بخوف وقالتلها / مش عارفه اتعامل مع اي حد ... حاسه اني غريبه عن الناس وطول الوقت خايفه منهم 

جدتها اخدتها في حضنها وبدات تطبطب عليها/ يا حبيبتي كل اللي انت حاساه دوت طبيعي علشان انت لسه راجعه من السفر وما اخذتيش على الناس هنا شويه بشويه هتاخدي عليهم وتحسي انك واحده منهم كمان
وبعدين قوليلي اي اخبار اللي اسمه معاذ الحديدي دوت ايه

سيلين اول ما سمعت اسمه ابتسمت وقالتلها / تخيلي لحد دلوقتي ما يعرفنيش ولا فاكرني . بس هيفتكرني ازاي اصلا ده فرق سنين كبير .

جدتها/ بس ابوه لو شافك هيعرفك صقر الحديدي كان صديق لابراهيم العزازي و بيحبه .. يلا قومي اغسلي وشك و فوقي كدة 

ودخلت سيلين اوضتها عشان تغير هدومها في اللحظه دي بدات تفتكر مواقفها مع معاذ اللي حصلت من اكتر من عشر سنين

 لوقتها كان والدها اخذها وراح يزور صقر الحديدي وقعدت مع معاذ في الجنينة

فلاااااااش بااااااااااااااااك ✨
في الجنينه❤️

سيلين باحراج / هما فين باقي العيله . بابا قالي ان انا هاجي هنا الاقي بنات لكن جيت لقيتك انت 

معاذ بصلها باستغراب / اي ده .. يعني ايه لقيتك انت دي




 و بعدين محدش جابرك انك تقعدي معايا ..ممكن تخشي الفيلا .. و اه جميلة و كارمن مش موجودين و فهد في النادي عنده تمرين 

سيلين /على فكره انا ما اقصدش حاجه وحشه انا بس زهقانه وانت من ساعه ما جيت قعدت معايا في الجنينه ماسك تليفونك طب علي الاقل اتكلم معايت

معاذ ابتسم / ماشي شكلك لذيذة ..اصل بصراحه انا كنت شايفك و انتي داخلة مع باباكي وحسيتك مغروره 

سيلين باستغراب /يا سلام طب ما انا كمان شايفاك تنك بقولك ايه هي العجله اللي هناك دي بتاعه مين
و بينفع اركبها ولا لا

معاذ / بصي العجله دي بتاعه كارمن ولو عرفت ان حد مسكها هتبهدل الدنيا بس جدعنه مني تعالي اركبهالك

سيلين بفرحه / بجد اصل انا بابا بيخاف عليا قوي ورافض ان انا اركب اي عجله يعني خايفه اتعور

 معاذ بستغراب/ ليه دي عجله يعني عموما تعالي وانا هبقى جنبك ما تخافيش

وراح معاذ وقف جنب سيلين وركبها العجله وهي كانت خايفه جدا لكن كانت فرحانه اوي .. 

وقعدوا يلعبوا مع بعض واتكررت الزياره دي مره تانية واحده ومن ساعتها وهي ما تعرفش عنه اي حاجه خالص لحد ما رجعت من السفر وقررت تقدم تبقى معيده و اتصدمت اول ما عرفت انه في نفس الكلية .

فاقت سيلين من ذكرياتها ومسحت دموعها وقالت وهي بتبتسم / ذكريات حلوه .. عيله الحديدي كلها حلوة يابختكم ببعض.. يا ترا يا معاذ هتفتكرني ولا لاء 

______________________________________________
في شقة عساف ❤️
في الحمام 😁

 معاذ كان ظبط لعساف شعره ودقنه وبصله كده باعجاب وقاله / طب وربنا ما باين عليك انك راجل عجوز وانا لو كنت بنت كنت عاكستك 

عساف ضحك وهو بيبص في المرايه وقاله/ ما قلتليش بقى ست سيلين دي اسمها ايه . اسم ابوها ايه عيلتها كدة 

معاذ قعد يفتكر شوية/ بص مش فاكر اوي بس تقريبا قالتلي سيلين العزازي حاجه كده يعني

عساف بصله بصدمه / انت بتهزر بنت ابراهيم العزازي انت عارف انا بقالي قد ايه ما شفتوش ... ده ابوها ده راجل كويس اوي .. هو رجع مصر 

معاذ بصله باستغراب /لا انا ما اعرفش اي حاجه غير انها قالتلي قبل ما تهزقني من المره الثالثه ان ابوها متوفي 

عساف اتاثر قوي اول ما عرف بوفاه ابراهيم العزازي
 وقاله / ياه .. الله يرحمه والله كان راجل طيب واتبهدل كثير من مراته ساب البلد كلها علشان يريح دماغه

معاذ باستغراب/ اتبهدل من مراته يعني ايه مش فاهم

عساف / ما هو ابراهيم كان متجوز واحده اللي هي تقريبا 
ام سليم دي بس مش مصريه هي من لبنان ومعاها الجنسيه الامريكية بس شخصيتها صعبه جدا وكانت طول الوقت بتهددوا انه ليسافر معاها يا هتاخد البنت ومش هتوريهاله ثاني .. و صفى كل شغله وسافر ومن ساعتها ما نعرفش عنه حاجه

معاذ اتاثر بكلام عساف لكنه برده ما افتكرش سيلين خالص و مفتكرش انه كان يعرفها ولكن صعبت عليه 




في اوضة لارا 😑

لارا غمضت عينيها بحزن ووجع وقالت لجميله/ اقري انتي الجواب يا جميله مش قادره ..

وفعلا اخذته وبدات تقراه واتصدمت في كل كلمه كانت مكتوبه وملامح الصدمه اترسمت على وش جميله
 وقالتها / الاحسن انك انتي اللي تقريه يا لارا  

واديتها جميله لجواب وكمان ثابت الاوضه وخرجت قعد
 في الصاله مع همس 

لارا مسكت الجواب وكانت حاسه ان قلبها بينبض جامد وخايفه لكنها جمدت قلبها ومسكت الجواب وبدات تقرا الكلام المكتوب فيه
 واللي كان :- انا عارف ان انتي دلوقتي بتكرهيني و بتكرهي نفسك لانك حبيتي واحد زي و بتكرهي واليوم اللي شفتني فيه و بصراحة عندك حق اذا كان انا مش طايق نفسي 
بس معنى ان الجواب في ايدك دلوقتي اني خلاص بره مصر و خلاص مش هتشوفي وشي تاني .. بس انا كنت عايزه اقولك حاجه واحدة يا لارا 
سامحيني ارجوكي سامحيني .. لانك ما عشتيش بهدله وذل زي ما انا عشته .. ساعات كتير الحوجه تخلي الواحد يتنازل عن مبادئه وده اللي انا عملته انا اسف والله العظيم اسف 
انا حقيقي ندمان علي اللي عملته.. علشان اثبتلك اني نفسي اصلح اي حاجه في نفس الظرف هتلاقي ورق لو عساف شافه هيعرف ياخد حقه من مختار ويمكن ساعتها يرجعلي جزء من كرامتي اللي عمي دفنها في التراب 
و كان سؤالك ليا ليه كل العداوه اللي بين عيله الحديدي والسيوفي الاجابه عند خالد يا لارا ..

رمت لارا الجواب علي الارض و فضلت تعيط جامد ومكنتش مصدقة ان كل اللي عاشته و حسته مع بني ادم ده انتهي بجد ..

لارا بوجع / وانا اللي كنت فاكره ان اكيد الجواب ده اعتراف منه انه بيحبني و انه مقدرش يقولها 
طلعتي برضو غبية .. طلع نفسه تسامحيه علشان بس ميعشي شايل الذنب ... اهااااا يارب برغم كل اللي عمله فيا لسه قلبي واجعني ... يارب خرجه من قلبي انا تعبت بقي 

في الوقت ده دخلت جميلة و شافتها واقعة علي الارض جريت عليها و فضلت تهدي فيها و اخدتها في حضنها بخوف و فضلت جميلة جمبها لحد ما تأكدت ان لارا نامت و خبت حوار الجواب عن كل اللي كانوا موجودين و روحت هي و معاذ .
_______________________________________________ 
تاني يوم الصبح 🌼

في الغردقة علي المركب 

يزن طلع علي سطح المركب و هو لابس شورت فقط و كان بيتمطع براحة و فتح علبة السجاير و طلع سجاره و قعد و مسك تليفونه و في نفس الوقت طلعت ميرا و هي لابسة قميص ابيض قصير جدا و راجت قعدت جمبه 

يزن اتفاجاه / اي ده انتي صحيتي امتي.. ده انا سايبك نايمة

ميرا قعدت في حضنه بفرحة/ اول ما قومت من جمبي انا صحيت علطول .. عندك اعتراض

يزن حط ايده علي شعرها و قربها منه و باسها بحب / لا معنديش اعتراض . انتي تعملي اللي نفسك فيه كله .. لان اليومين دول انا ليكي انتي و بس 

ميرا قربت منه هي كمان و طبعت بوسه علي خده و اخدت السيجاره و رمتها في البحر و يزن استغرب جدا / ليه كدة بس يا ميرا .




ميرا بدلع و هي بتشد التليفون كمان / مش انت قولت انك ليااا انا بس ... انا مش عايزة اشوفك بتشربها طول ما انت معايا بجد بخاف عليك اوي اقولك ولا تمسك التليفون كمان 

 يزن شدها من وسطها عليه و قربها و خلاها تقعد علي رجله / امممم طيب وانا موافق بس عايز تعويض و انا اوعدك اني مش هشربها طول اليوم 

ميرا بفرحة قربت و باسته بحب / وانا تحت امرك 

يزن ابتسم اوي و قالها / اذا كان كدة يبقى يلا علشان ننزل نعوم في الماية 

ميرا خافت اوي لان عندها فوبيا من الميه من ساعه موت والدها ويزن عارف كده وكان بيحاول يكسر الحاجز ده 

يزن / ايه للدرجة دي مش واثقة فيا و لا خايفة مني ..
 ايه يا ميرا وشك اتلون كدة ليه 

ميرا برعب بدات ترجع لورا بخوف/ لااا يزن و النبي بلاش انا بترعب من الميااه و حياتي عندك .. ابوس ايدك 

يزن قرب منها و اخدها في حضنه / بس انا مش عايزك تخافي طول ما انتي في حضني يا ميرا لاني عمري ما هسيبك والله 

وفي عز ما ميرا سرحانه في كلامه شدها على الميه ونزلوا هما الاثنين و ميرا اتشعلقت في رقبة يزن بخوف .

في الماية 🏄
ميرا بخوف ماسكة في رقبته / يزن بالله عليك اوعي تسيبني والله ده انا ممكن اموت علطول 

يزن ضحك جامد بعلو صوته / طب ايدك و انا فاهم انك معلقاها في رقبتي .. لكن رجلك دي فين مكانها 
انتي بتعملي كدة ليه .. نزلي رجلك هنغرقك 

ميرا / والله ابدا انا هفضل قافشة فيك كدة بايدي و رجلي زي الكابوريا لحظ ما نطلع ..

يزن رفع حاجبه بقي كدة / طيب استلقي وعدك بقي 

و فاجاه يزن اخدها و غطس تحت الماية و طلع تاني بسرعة و ميرا كانت خايفة و بدات تعيط .

ميرا بعياط و تضربه بايديها بخوف / طلعني من هنا .. طلعني يا يزن علشان انت وحش و بتخوفني اكتر 

يزن صعبت عليه لما عيطت / خلاص انا اسف والله حقك عليااا .. خلاص بقي والله ما هنغطس تاني و ده وعد مني يلا فكي ايديك كدة براحة علشان اعوم انا و انتي 

و بدا يخليها تاخد علي البحر شوية بشوية و انسجمت اوي 
و حلف انه يخليها تتعلم السباحة علشان متخفش من حاجة تاني ابدا .

______________________________________________
في مكان مهجور 😑
شقة قديمة كانت قاعدة فيها ام ميرا و جوزها 

ام ميرا بعصبيه / هو احنا هنفضل قاعدين هنا يا خيري محبوسين مش عارفين مين بيراقبنا ولا ايه

خيري بحده / بقولك ايه اهدي كده على نفسك و متزعقيش انا جاي عشان انت قلتلي انك عايزاني في موضوع مهم لكن لو جايباني عشان تزعقي انت وجوزك هقلب عليكم

جوزها / اهدي احنا مش عايزين مشاكل اسمع يا خيري احنا سلمنالك دماغنا علشان احنا مش قدكانت قلت انك عايز ميرا سيبناك الفيلا بميرا لكن دلوقتي هي بقت مرات الظابط ده واحنا مش حمله عشان كده عايزينك تخرجنا من الموضوع ده تماما

خيري بتريقه/ يعني عشان خاطر حته ظابط ما يسواش ربع جنيه خايفين ده صرصار افعصه برجلي

ام ميرا / والله بقى تفعصوا ولا لاء ..احنا ملناش دعوه انت وعدنا انك تحمينا والفلوس اللي اتفقنا عليها قلتلنا انها هتبقي معانا على اخر الشهر ده فين وعدك ما تنفذه 

خيري اتغاظ جدا منها وقال / خلاص اتفقنا النهاردة بالليل جهزوا نفسكم عشان هتسافروا ومعاكم الفلوس ....سلام 
______________________________________________

في المكتب عند عساف ✨

عساف نزل شغله وكان كل الناس فرحانه وبترحب بيه وبعد ما دخل بحوالي ساعه بيتفاجئ بالباب بيتفتح ودخل صقر ومعاه كريم .

صقر بهزار / اعتقد ان احنا سيبناك كثير وحان الوقت ان احنا نتدخل ولا ايه رايك 

عساف ابتسم / ابنك قام بالواجب وزياده تعالى يا صقر ادخل .

كريم ببتسامة / اي صقر لوحده هو اللي هيدخل بس ولا ايه مش فاهم 

عساف بص لكريم بحزن و قاله باندفاع / انت عارف اني لا طايقك ولا طايق ابنك .. انت عارف كدة ولا لاء 

كريم ضحك جامد/ طب اهدي يا عساف ممكن .. صدقني يزن اه غلط بس هو غصب عنه و ندمان 

عساف / يسلاااام علشان كدة مسافر مع مراته يقضي شهر العسل .. هو انت فاكرني نامي علي وداني يا كريم .. ابنك ده واطي و ابن جزمة و لو شوفته هديله بالجزمة

كريم ضحك/ الصراحة هو يستاهل انا مقدرش انكر بس اعتبره ابنك يا عساف . ده انت اللي مربيه برضو 

عساف / ما انا تربيتي زبالة يا حبيبي . علشان كدة لازم اعيدها تاني للاتنين لارا و يزن ... بقولكوا ايه انتوا جايين ليه 

صقر بصدمة / الله يخربيتك يا اخي .. انت شخصية مزدوجة يا ابني ايه اللي قلبك كدة علينا تاني ده انت المفروض اصلا تشكرني ان انا جيت برغم اللي انت عملته مع اخويا 
ده خالد قالب عليك قلبه ما يعلم بيها الا ربنا

عساف حط ايده علي راسه / مش عارف بس متشتت خالد عنده حق يزعل مني لاني مصنتش الامانة و نغم كمان . انا مش عارف اعمل ايه

كريم / طب هو انت اتكلمت مع لارا قعدت معاها 
بنتك محتاجالك قوي يا عساف نفسها تحس ان انت لسه
 في ظهرها

عساف بوجع / نفسي ادخل اوضتها بس بخاف اقرب ناحيتها حتي .. عايز اتكلم معاها اوي بس خايف .. خايف افقد اعصابي عليها و هي في حالتها دي فاخسرها للابد 

صقر/ خلاص هاتها عندي الفيلا .. هتبقي وسط كل اللي بيحبوها و اعتقد انها هتفك اسرع و بالمره همس ترتاح شوية 

كريم / طب والله فكره تجنن صح يا صقر لما تروح هناك جميله هتبقى معاها ومعاذ وفهد و هيقدروا يفكوها من اللي هي فيه 

عساف / بس خالد ممكن مش حابب وجودها او وجود همس و بصراحة هيبقي عنده حق 

صقر / ايه يا ابني الكلام العبيط اللي انت بتقوله ده خالد بيعشق لارا و كان مرعوب عليها .. بس هو مش طايقك انت دي حقيقة و مش هقدر انكرها 

عساف ضحك وقاله /خلاص هكلم همس وهقولها و يجوا عندك الفيلا 

وفعلا همس رحبت بالفكره جدا وكلمت نغم وراحوا الفيلا هناك ونغم رحبت بلارا ترحيب قوي ولا كان في حاجه حصلت حتى كارمن قعدت معاها في الاوضه علشان تسليها .. 

_______________________________________________

في اوضة كارمن .

كارمن كانت لسه خارجه من الشاور وهتخرج تروح للارا بس اتفاجت ان تليفونها بيرن 

كارمن بهدوء / الو مين معايا 

عز بغيظ / مين معاكي انتي بتستهبلي يا كارمن.. هو انتي مش مسجلة رقمي مثلا ..و بعدين لو انتي مش عارفة مين بيتصل بتردي ليه بالحنية دي كلها 

كارمن بستغراب / في ايه يا عز مالك قالبة معاك زعيق علي الصبح ليه كدة ..الواحد اول ما بيتصل بيقول سلام ..اهلا مش بيزعق 

عز / والله ..طب مش مسجلة رقمي ليه بقي 

كارمن ابتسمت/ مسجلاه والله بس الرقم ده اول مره تكلمني منه 

عز استغرب و بص في التليفون و عرف انه فعلا مكلمها من رقمه التاني و ابتسم و قالها/ ايوة طلع كلامك صح انا اسف.. طب بتعملي ايه بقي 

كارمن / ولا حاجة كنت باخد شاور ..انت عايز ايه مني 

عز / امممم بصراحة كنت عايز اسمع صوتك يعني لو مش هيضايقك .. علفكرة بقي انا مستني يزن يرجع من شهر العسل بتاعه ده علشان انا هاجي عندكم انا و ماما 

كارمن فرحت اوي و بدات تتنطت بفرحة / احم بجد ..طب




 و ليه مستني يزن يجي بقي ولي امرك يعني 

عز فرح اوي و قالها / شكلك يا نصه مستعجل اكتر مني بس بصراحة يزن انا بعتبره اخويا الكبير فلازم استناه .. ولا انتي ايه رايك اكبر منه خالص 

كارمن باحراج/ عز بقولك ايه انا لازم اقفل علشان...هاا باي 

عز / بت استني .. هتوحشيني علفكره 

كارمن بكسوف / يالهووووي 

و قفلت كارمن السكة في وشه و عز فضل يضحك علي طريقتها المحببة لقلبه و فضل يدعي من قلبه انها تكون من نصيببه 🌹
_______________________________________________

في اوضة لارا

كارمن دخلت اوضه لارا وهي بتزغرط / ست لارا رجعت 
يلا نهيصلها ..و ناكل عيش و بندق و نبارك و نبارك لامهااا .. 

لارا ضحت جامد علي طريقة كارمن و فهد اللي كان واقف بيطبل معاها .

فهد / احم احب اقولك اني فرحان انك جيتي الفيلا والله العظيم اول ما عرفت انك جيتي خدت اسبوع كامل من الشغل اجازة عشان تعرفي معزتك عندي

 نسمه ضحكت بتريقه / متصدقيش يا لارا ده كان بيتلكك عشان ما يروحش الشغل بس اونكل صقر قال ان هو اجازه النهارده فقط وهيرجع تاني بكره

فهد رمى عليه على المخده بغيظ / يا بنت انتي معايا ولا عليا المفروض انت مراتي وباذن الله بعد تسع شهور هتبقى ام عيالي يعني المفروض تقفي في ظهري حاي لو بكدب 

نسمه بتريقه / يا سلام و ده في عز مين بقي إنشاءالله

لارا ضحكت على جنانهم / هو انتي الحامل يا نسمه الف مبروك يا حبيبي ربنا يتمملك على خير ان شاء الله

نسمه بكسوف / ربنا يخليكي يا رب شكرا .

كارمن / طب انا اتمنى بس ان الشو اللي انت وجوزك عملتوه يكون انتهى وخلص علشان طنط لارا محتاجه ترتاح واكيد اشكالكم لازم تطلع بره 

فهد / الله الله ده احنا بنطرد بقى واحنا مش واخدين بالنا يا نسمة 

كارمن / مش واخدين بالكم ايه ما انا بقولهالك في وشك اطلع بره و خذ مراتك في ايدك .. ايه اعمل ايه تاني اكلمك بالانجليزي ياض

فهد / لا بلاش مش هفهمك كنت بسقط فيه .. خلاص انا هاخد مراتي وامشي عادي خالص بس ايه بقي خليكي فاكراها يا كارمن 

و لسه هيخرح برا رجع براسه و قالها / ومش مسامحك على فكره

كارمن بغل / اطلع بره يا فهد بدل ما اقلب عليك 

وخرجوا هما الاتنين بره وكارمن قفلت الباب وراهم وقعدت جنب لارا و لارا استغرب منها و خصوصا ان مافيش عمار مابينهم ابدا 

كارمن / مالك يا ست وشك قلب ليه كده في ايه هو انا جاية اكلك .. انا بس خرجتهم بره عشان نعرف نهيص انا وانتي ونشغل اغاني ونرقص

لارا / نرقص والنبي يا كارمن حصليهم و اطلعي برا 

كارمن / لا لا بقولك ايه اظبطي كده واتعدلي انا غير الخلق اللي بره دي خالص .. وجو الاكتئاب ما بعد الاختطاف ده وحش قوي ما بحبوش ..يلا قومي يا شيخة محدش واخد منها حاجة 

وقامت كارمن و شغلت اغاني شدت لارا معاها اللي كانت عماله تضحك على كريمة كارمن و هزارها .. واول ما رجعت جميله من كليتها اتجننوا كلهم وكانت كمان نسمه معاهم وده فرح صقر قوي ان كارمن خليفه نغم قدرت تخرج لارا من روح الاكتئاب اللي هي فيها ..

في الجنينة.. 🌺

نزل صقر ولقى خالد قاعد في الجنينه وحاطط الايربود في ودنه .

صقر قعد جنبه وهو بيضحك / اول مره اشوفك حاطط البتاع ده في ودنك دايما تقول بيجيبلي صداع

 خالد بتعب / علي اساس ان الفرح اللي كارمن عملاه فوق ده ميجبشي مش كدة .. ده ايه ده هما مش بيتعبوا ولا ايه صقر ده انا صدعت دول من الساعه 6:00 والساعه داخله على 11:00 وهم بيرقصوا و بيغنوا 

صقر ضحك / كله من بنتك بسم الله ما شاء الله عندها كميه طاقه غريبه نغم نغم يعني ما فيش كلام

خالد ضحك / انت بتقول فيها عندك حق والله عارف البنت كارمن دي بحسها شخصيتها المزدوجه عامله زي انا وامها بيبقى جواها نار بس قادره انها تضحكك وتفرفشك ولا كاني في اي حاجه 

صقر / وفهد على فكره كمان كده ..بقولك ايه صحيح بما ان همس هنا ولارا كمان ايه فايه رايك يعني ان عساف يجي يقعد معانا بدل ما يقعد في البيت لوحده وانت شايف الحاله اللي هو فيها

خالد بزعل / يجي يا صقر ميجيش ليه ده بيتك برده بس
 لو جه انا ما ليش علاقه بيه خالص لازم تعرف وتقوله انه لو وجهلي كلام يبقى يقابل بقى 

و قام خالد وساب صقر قاعد في جنينه لوحده محتار وبيكلم نفسه / روح الله يخرب بيتكم .. ويخرب بيت دي صحوبيه وقرابه ده انتم عالم تقرف

وفي الوقت دوت دخل معاذ وهو فرحان جدا وجري على صقر /مالك يا بابا وقاعد بتكلم نفسك ليه في حاجه ولا ايه

صقر /في حاجات يا ابني مش حاجه واحده تعالى اقعد مالك مبسوط ليه

معاذ/ بصراحه كده ادهم راجع بكره الصبح عشان كده مبسوط قوي

صقر / بجد هيخرج من المصحه خلاص طب الف مبروك

معاذ كشر فجاه وبص لصقر بخوف وقاله / انت عرفت ازاي
 يا بابا .. هو 

صقر / انت لو كررت كلمه دي تاني انا ههزقك يعني انت عايز تفهمني ان انا همشي ورا حبه عيال زيكم ومش هدور على ادهم بنفسي انا مرضيتش اتكلم عشان ما احرجكوش وعشان حبيت امانتكم مع بعض 

معاذ / نفسي اعرف افهم بتعرف كل الكلام ده ازاي وكانك مركب كاميرا مع كل واحد فينا يا صقر مش كده

صقر / امال انت فاكر يا ابني انا لو ما عملتش كده البيت اللي انت شايفه ده كله هيتهد فوق دماغنا
 انا بحاول على قد ما اقدر ابقي حواليكم واحميكم من شر نفسكم .. المهم ما تغيرش الموضوع انت قابلت ادهم

معاذ / بصراحه قابلته وخارج بكره هيكمل علاجه في الفيلا وعنده امل واحد بس بابا انه يتجوز جميلة هو بيحبها اوي و هي كمان بتحبه اوي 

صقر / وانا عمري ما اقف في طريق سعادتهم هما الاثنين عيالي اول ما يخلص فتره علاجه و اطمن عليه هعملهم اكبر فرح في مصر 

معاذ فرح جدا وحس ان هو كده حقق وعده مع ادهم وبص لقى صقر بيبصله بحبه وقاله / عقبال ما افرح بيك انت كمان يا ابني البكري .. تعالي انا عايز اخدك في حضني 




معاذ اتبسط قوي وحضن صقر بفرحه و لقه صقر
 بيقوله / اوعى تزعل مني على القلم اللي اخدته .. انا عايزك تعرف اني واثق فيك انك عمرك ما تعمل كده وعملت كده من ضغطهم عليك بس ما ينفعش كبير العيله يتضغط عليه تحت اي ظرف يا معاذ .. صح 

معاذ بفرحة و حب / صح يا بابا .

وطلع معاذ بعدها يرتاح عشان كان عنده محاضرات ثاني يوم وصقر طلب من البنات ان هما يناموا وكفايه اغاني وعساف كمان رجع الفيلا بس ما تقابلش مع خالد .

______________________________________________

في القسم ..

عز بصدمه / ايه اللي انت بتقوله ده يا مراد جريمه قتل
 مين اللي مات .. في ايه يا مراد انت داخل تقولي فوازير 

مراد بشماته / راجل و مراته يخصوك اوي

عز اترعب من الفكره و قام من مكانه / لا ....يزن

تمتلك مدونه دار الروايه المصريه مجموعة 
من أكبر الروايات المتنوعة الحصرية والمميزة
اكتب ف بحث جوجل دار الروايه المصريه
 واستمتع بقراء جميع الروايات الحصرية والمميزة

تعليقات



    حجم الخط
    +
    16
    -
    تباعد السطور
    +
    2
    -