اسكريبت مالك وليلي كامل بقلم
- امسكي يا اخرة صبري الميكس شوكولاتة الى بتحبيه و الكيكه البرتقان الى لسه معرفش علاقتهم ببعض و الشيبيسي بالكباب الى بتحدقي بيه مع اني اعرف ان الناس بتحلي مش بتحدق
= اييييييي مش هتبطل كل مره كده نفس الكلام طب جدد
- انجزي بس وقوليلي الخبر اية عشان الفضول قتلني
= خمن!
- ماهو ده المكان المفضل بتاعنا فا اكيد خبر تحفه اية بقي
= حاجه بخصوص زياد
بلعت ريقي وحماسي قل: زياد شريك اونكل فالشركه؟
- ايوه يابني
= طيب قولي؟
- اليومين الى انت سافرت فيهم زياد اتقدملي و انا وافقت كنت فرحانه اوي لما كلمتني فيديو كول ده كان سبب اني فرحانه بس مرضتش اقولك عشان حبيت اشاركك وانت جمبي هنا اية رأيك انا بحبه اوي يا مالك و..
الكلام وقف مكنتش سامع الباقي كنت مهنج لحد ما خبطتني وفوقت وشي كان اصفر بس مكنتش هقدر اقول غير
- بجد! طب حلو اخيرا هخلص منك.
= هو!؟ مش فاهمه حلو بس ده تحفه وهتخلص اه
- ايوه فعلا مبروك يا لولي بجد
= عبالك يا مالك عاوزين نتجوز سوا زي ما كنت بتقولي
- انتي بتحبيه من بدري.؟!
ضحكت: بصراحه كنت معجبه بس مرضتش اقولك عشان بتفضل تقولي اني بكراش على اي حد وعديمه الكرامه
ابتسمت بالعافيه: ايوا فعلا بس اديكي هترسي على واحد
= هيييح ايوااا انا عاوزاك معايا فكل حاجه انت صاحبي الوحيد زياد عنده صحاب كتير اوي وانا معنديش غيرك
- اكيد يا ليلي ، بس.. انا لازم امشي عندي شغل كتير اوي
= بسرعه كده! في اية؟
- معلش والله غصب عني بس هنتكلم بليل زي كل يوم
= توعدني
- اوعدك
رجعت بليل لكن مكلمتهاش وسمعت الفويس نوت بتاعتها
" مالك زمانك رجعت من ساعه انا مستنيا "
" يا ابني انت فين "
بعتت رسايل كتير اخرهم كانت رساله كسر*تني انا
" مالك! اول مره متوفيش بوعدك ليا "
اقولها ازاي اني بحبها وعشان بحبها مينفعش تعرف اني بحبها!! مينفعش اخسرها لكن! انا خلاص خسرتها من ساعه ما جه واحد بدالي انا لازم ابعد لاني معملتش حساب كل ده
فرحها بيقرب الوقت بيعدي عليا وكل يوم بمو*ت اكتر من الى قبله مش قادر انا فضلت شايل حبي عشان مخسرهاش عشان بحبها ومش هقدر انها تبعد بس انا الى ببعد دلوقتي
دورت عليا فكل حته بتسأل كل الى يعرفني بتبعت كل يوم رسايل وبتسأل انا فين عامل اية فتحت موبايلي ولقيت اكتر من 100 مسدج منها
وكالعادة اخر مسدج بتكسر كان فويس مدته اربع دقايق كانت بتعيط
" مالك انا خايفه انت سبتني انا فرحي بيقرب وانت مينفعش متبقاش معايا في يوم زي ده ، انت بالذات مش هينفع انا لوحدي انت من يوم ما مشيت وانا مش عارفه اعمل اي حاجه انا بروح مكانا المفضل كل يوم استناك ومش بلاقيك انت فين ارجع "
دموعي نزلت زيها بالظبط بس خلاص انا اقدر انهي كل ده هي متستاهلش تتعب بسببي لازم ابقي جمبها لازم اروح واكون معاها هي عندها حق انا بحبها ولازم اضحي عشانها
جه يوم الفرح لبست بدله واتشيكت وافتكرتها وهي بتقولي اني جميل اكتر فالكاجول رسمت على وشي ابتسامه عشان خاطر عيونها مش هينفع تحس ب اي حاجه..
وصلت هناك وشوفتها ملحقتش اعمل اي حاجه ولقتها جايه عليا: مالك!!!!!
ابتسمت وسلمت عليها: قد اية انتي لخمه مش عارفه تتصرفي من غيري يعني كل ده!
- زياد.. زياد مع كل صحابه وانا انا.. انا
كانت هتعيط فا لحقت الموقف: شششش اية جرا اية يا نكدوا الميكب هيبوظ!!! يخربيت معرفتك هيقولوا نكد عالبت يوم فرحها!
ضحكت وهي متوتره: هو انت كويس كنت فين انا عايزه اقولك كلام كتير و
- ليلي اهدي حصلت ظروف هبقي احكيلك المهم اية العروسة القمر دي اخيرا شوفتك بفستان قبل ما اموت!
عيونها دمعت: انا بحبك اوي انت وجودك مهم اوي يا مالك متعملش كده تاني خليك جمبي احنا عمرنا ما بعدنا من واحنا صغيرين
= طب اهدي عشان لو عطيتي وبوظتي الميكب التحفه ده الى عملتهولك هتقتلك ، انا كمان بحبك جدا وفرحان عشانك اوي وعلفكره انتي احلي من الواد زياد ده اصلا متقعديش تقولي قمر مفيش قمر غيرك انتي تستاهلي احسن حاجه
قاطعنا دخول زياد سلم عليا و راحوا قعدوا سوا عينيها كانت عليا طول الفرح كنت مدايق عشان خلتها خايفه اني امشي اتأكدت انها بقت كويسة والفرح خلص و ودعنا بعض هي روحت معاه
لكن انا رجعت على المكان المفضل بتاعنا بنروحه من واحنا عيال بس المره دي انا روحت لوحدي.
تمتلك مدونه دار الروايه المصريه مجموعة
من أكبر الروايات المتنوعة الحصرية والمميزة
اكتب ف بحث جوجل دار الروايه المصريه
واستمتع بقراء جميع الروايات الحصرية والمميزة
اكتب تعليق برايك هنا